Rev 11 | DOB | STEP | Muliyega 'etoguna 'ebweuna 'i'ebwa'egu 'atuwa 'ebe 'etopwapwa, ta 'enega 'ieonegu, 'igwae, “'Utoolo be Yaubada 'ina Anuwa Tabu ta 'ebe taliya wate 'u'etopwapwadi, be wate tobwagobwagoyao solanaya 'usawadi.

Revelation of John 11

Yaubada 'ana tosimana nidi 'eluwa

1 Muliyega 'etoguna 'ebweuna 'i'ebwa'egu 'atuwa 'ebe 'etopwapwa, ta 'enega 'ieonegu, 'igwae, “'Utoolo be Yaubada 'ina Anuwa Tabu ta 'ebe taliya wate 'u'etopwapwadi, be wate tobwagobwagoyao solanaya 'usawadi. 2 Ta esi Anuwa Tabu mwaumwauna geya'abo 'u'eto'etopwapwa, manuna mwaumwauna nate 'owagao manudi, taudi nate nigeya me Yudia, be 'aediyega Yaubada 'ina 'asa nina sida giebaili nawalae potitu soladiya. 3 Ta tosimana 'eluwa yaetunedi, ma 'adi 'oama 'atuwa nadigega kwabulao 'adi 'oama, be Yaubada 'ina ona sida simane 'asiyata tuwelo analedi be sikisiti nidi soladiya.”

4 Tosimana 'eluwa nidi 'atuwa kaiwe olibe 'eluwa, ta wate 'atuwa mayale nidi 'eluwa sitootoolo bale'u 'ana 'Inapwana matanaya. 5 Ta 'eguma yaita 'itoo be 'ietalauwala tosimana nidi 'ediya, 'awe sabelulu 'awadiyega 'iapwesa be 'adi talauwala nina 'igieto'umaliye, be gete 'enega 'adi talauwalao siloemwawasidi.

6 Siteluwa gete ma idi loina, be tuta nidi Yaubada 'ina ona sisimasimana, 'usana galewega si'etobodedi. Wate ma idi loina wewelupwa 'ediya, be sida elala. Wate ma idi loina mwau be 'elouya manudi, be 'abo to tuta 'ena nuwanuwadi be mwau nidi siapwesama sida apwesa tuga.

7 'Enega tosimana 'eluwa nidi 'idi simana tomota 'ediya 'igumwalaya, ga yobai 'ebweu gaula nina sinabwana 'enega 'iapwesama, ga 'ilosaiya tosimana nidi 'ediya, ta 'iewaiwai ga 'iloemwawasidi. 8 Ta kokowadi sida 'eno besobeso 'asa sinabwana solanaya. 'Asa nina lowa 'ida 'Inapwana 'ena sigiekeloseyena, ta 'asa nina 'ana kunuwadawada sieesena Sodoma, nai Itipita.

9 Tomota yauyaudi sida mai bodao be susuyao be 'enanao be 'ebeloinao 'ediyega, be 'enega kokowa nidi sida 'ita'itadi 'asiyata 'etoi ta tupwana 'ediya. Ta kokowao nidi 'adi sa'u'ali'ali si'etobodena. 10 Ta me bale'u sida gwausowala tosimana 'eluwa nidi 'idi mwawasa manuna, be sida gimasula, be oboboma sida 'ebwaya 'ebweuna 'ebweuna 'enaya, manuna palopita 'eluwa nidi 'elouya sinabwadi me bale'u 'ediya sime'edi.

11 Ta 'asiyata 'etoi be tupwana sigumwala, ga Yaubada yawasina 'ediya 'i'ebwaya, ga sitoolo, 'enega tomota yaudi si'itedi, ta simatauta sinabwana. 12 'Enega palopita 'eluwa nidi 'enana galewega sinonona, 'ionaona 'ediya, 'igwae, “Watu'ema bada.” 'Enega pwanega situ'etu'e, ta 'adi talauwalao nidi siduneduneyedi. 13 Tuta nina gote 'enaya mwani'ini'i sinabwana 'iapwesa, ga 'asa nina sinabwana 'ana weyala sanau 'ediyega 'ebweu sena 'iligeina, ga tomota 'adi yau sebeni tausani simwawasa mwani'ini'i nina 'enega. Ta tomota nidi taudi situpwa simatauta 'ai'aila, 'enega Yaubada nina galewaya situpuna 'ina waiwai manuna.

14 Ta 'elouya 'eluwena ni'atu 'igumwala, ta 'etonina 'iabe 'iapwesa.v12 2 Kin 2:11v14 Et 9:12

Yoguli esebenina 'imu'ena

15 'Enega anilose esebenina 'ina yoguli 'imu'ena, ta galewega 'enadi sinabwana 'enega sigwaegwae, “To'etoseyana nina maTamana Yaubada ni'atu sietoloina bale'u 'ina 'ebeloinao maibo'adi 'ediya, ta geya'abo 'idi loina nina 'igumwagumwala.”

16 Ta 'inapwanao nidi site tuweniti powa Yaubada matanaya simiyatowa 'idi 'ebemi esaesa 'ediya, taudi sibe'u sanamwa'uta ga 'enaya silotuputupu, sigwaegwae:

17 “'Ima 'Inapwana Yaubada Toewaiwai sayo, 'oyo 'umiyami batuwa, be tuta lowa 'ediya 'umiyami, 'alokagutoki 'emuya, manuna 'imu waiwai sinabwana 'ugieapwesena, 'enega 'ue'ale be 'uda loina. 18 Taudi nigeya me Yudia sigamwasowala 'ai'aila, ta esi 'imu bwa'omatana 'ana tuta 'iapwesama be tomwawasao sitoolo be 'uloinedi, ta 'imu palopitao 'adi e'isa 'uda 'ebwa'edi, be 'imu tomota maibo'adi 'adi e'isa 'u'ebwa'edi, taudi sinasinabwadi be gidagidalidi 'ediya, manuna taudi sana 'amu to'amayabao. Ta esi bale'u 'ana togieto'umaliyao 'oyo 'uda gieto'umaliyedi.”

19 'Enega Yaubada 'ina Anuwa Tabu galewaya 'igigegena, ga Dedewaga Tabu, Anuwa Tabu solanaya, ya'itena, ga Dedewaga nina solanaya 'ina onaupaupa 'ana buki 'imiyami. 'Enega namala, be 'enanao, be wepalala 'ina dudu, be mwani'ini'i, be 'usana pulipulidi ta pa'alidi, siapwesama.v17-18 Et 1:8, 20:11-13; 2 Ko 5:10